Правила за платниот промет со странство за резиденти

А) Правила за кредитен трансфер во странство

Физичко лице - жител на Република Северна Македонија кое, во согласност со Законот за девизно работење, е дефинирано како резидент, може да извршува кредитни трансфери во странство. Сите трансфери освен оние кои, во согласност со Законот за девизно работење, се дефинирани како капитални трансакции, и за кои треба дополнителна документација, се без ограничување на износот и доволна е само информација за намената на средствата.

Кредитните трансфери кои се по основ на капитални трансакции, се извршуваат со задолжително прикажување соодветен документ пропишан со законската регулатива. Потребните документи се наведени во „Упатството за спроведување на Одлуката за начинот за извршување платежни трансакции со странство“ кое можете да го најдете на интернет-страницата на НБРСМ.

Подолу се наведени основите на трансферите кои се дефинираат како капитални трaнсфери и потребната документација, и тоа:

1. Кредитни трансфери во странство на дивиденди и други добивки од вложувања коишто се сметаат за директна инвестиција (директна инвестиција е вложување поголемо од 10 % во вкупниот капитал) на нерезидент во Република Северна Македонија, како и плаќање врз основа на продажба на вложувањето коешто се смета за директна инвестиција или за пренос на остатокот од ликвидациската маса: доказ за извршен упис во регистарот на директни инвестиции на нерезиденти при Централниот регистар на Република Северна Македонија и доказ за намирување на законските обврски врз основа на даноци и придонеси во Република Северна Македонија;
   
   
2. Кредитни трансфери во странство врз основа на вложување во хартии од вредност во странство од страна на резиденти коишто имаат третман на портфолио-инвестиции:
   - документ со кој може да се потврди дека трансакцијата ќе биде склучена преку овластен учесник на пазарот на хартии од вредност, преку овластен учесник на странска берза или преку организиран пазар на хартии од вредност;
   
   
3. Кредитни трансфери во странство врз основа на купување недвижност во Република Северна Македонија во сопственост на нерезидент, како и плаќање доход врз основа на издавање на недвижноста во сопственост на нерезидент:
   - доказ за извршен упис во регистарот на вложување во недвижности на нерезиденти во Република Северна Македонија при Централниот регистар на Република Северна Македонија;
   
   
4. За кредитен трансфер на физичко лице - резидент помеѓу сопствени платежни сметки, од кои едната е во странска банка, важат правилата пропишани со „Одлуката за начинот и условите под кои резидентите коишто не се овластени даватели на платежни услуги, можат да отвораат и да имаат платежни сметки во странство“ и        нејзините дополненија кои можат да се најдат на следнава врска Одлука за начинот и условите под кои резидентите коишто не се банки, можат да отвораат и да имаат сметки во странство  Кај овие трансфери не постои ограничување на износот.
   
   
5. Кредитни трансфери во странство врз основа на извршна исправа и присилно плаќање врз основа на извршна исправа: доказ од надлежен орган дека се намирени законски пропишаните обврски врз основа на даноци и придонеси кон државата, ако за основната работа за која настанала обврската за плаќање е предвидено приложување таков доказ.

Во согласност со Законот за девизно работење, за резидентите на РС Македонија постои забрана за кредитен трансфер на средства во странство по основ на животно и кредитно осигурување.

Б) Правила за кредитен трансфер од странство:

Физичко лице - жител на Република Северна Македонија кој, во согласност со Законот за девизно работење, е дефиниран како резидент, може да прима кредитни трансфери од странство. Сите трансфери освен тие кои, во согласност со закон се дефинирани како капитални трансакции, се слободни и без ограничување на износот, доволна е само изјава за намената на средствата.

Кредитните трансфери кои се по основ на капитални трансакции, се извршуваат со задолжително прикажување соодветен документ, пропишан со „Упатството за спроведување на Одлуката за начинот за извршување платежни трансакции со странство“.

Подолу се наведени основите на трансферите кои се дефинираат како капитални трансфери и потребната документација, и тоа:

1. Наплата на дивиденди и други добивки од вложување на резидентот во странство коешто има третман на директна инвестиција, како и повлекување влог или продажба на хартиите од вредност или уделите во странство коишто имаат третман на директна инвестиција:
   - доказ за извршен упис во регистарот на директни инвестиции при Централниот регистар на Република Северна Македонија;
   
   
2. Наплата врз основа на издавање и на воведување домашни хартии од вредност во странство: доказ за извршено пријавување во Комисијата за хартии од вредност;
   
   
3. Наплата врз основа на продажба или врз основа на издавање недвижност во странство во сопственост на резидент:
   - доказ за извршен упис во регистарот на вложувања во недвижности на резиденти во странство при Централниот регистар на Република Северна Македонија;
   
   
4. Физичко лице - жител на Република Северна Македонија, резидент, може да прими средства од својата платежна сметка од странство според „Одлуката за начинот и условите под кои резидентите, коишто не се овластени банки, можат да отвораат и да имаат платежни сметки во странство“ и нејзините дополненија кои можат да се најдат на следнава врска: Одлука за начинот и условите под кои резидентите коишто не се банки, можат да отвораат и да имаат сметки во странство
   
   
5. Наплата врз основа на продажба на хартии од вредност во странство коишто имаат третман на портфолио-инвестиции: документ со кој може да се потврди дека трансакцијата е склучена преку овластен учесник на пазарот на хартии од вредност, преку овластен учесник на странска берза или преку организиран пазар на хартии од вредност.

За вистинитоста на податоците и автентичноста на приложената документација, одговорноста ја сноси налогодавачот. Банката ги задржува приложените документи.